Stock Broking Business Challenges & Strategies: Insights by Arun Chaudhry

Hum log har second mein 400 se zyada orders execute karte hain. India duniya ka pehla aur akela exchange banne ja raha hai jahan same-day settlement start hone wala hai.

Aaj ek customer apne ghar baithe-baithe 3–4 minute mein Demat account khol sakta hai, jabki kuch time pehle ye process poora din leta tha.

Financial services industry mein abhi tak AI aur machine learning ka full potential use nahi hua hai.

As a broker, mujhe sirf doosre brokers se nahi, e-commerce websites se bhi compare kiya ja raha hai , jahan customers information instantly consume karte hain.

Customers ka patience level kam hota ja raha hai. Humein deal karna padta hai ek demanding customer, ek demanding regulator, aur ek demanding tech setup ke saath.
Ye sab bade challenges hain, aur humein inko real-time basis pe adapt karna padta hai.

Achhi baat ye hai ki ab log ye samjha pa rahe hain ki stock market gambling nahi hai , ki ya to paisa banega ya sab chala jaayega, aisa sochna galat hai.

Jab aap stock market mein invest karte hain, to patience bahut important hoti hai.
Har aadmi ko har waqt market mein invested rehna zaroori nahi hai.

Hello everyone!
Swagat hai aapka Bazaar & Beyond ke ek aur dhamakedaar episode mein,
jahan hum deep dive karte hain un trends, challenges aur opportunities mein jo aaj ke financial world ko shape kar rahe hain ,
so you can make smarter decisions with your money.

Main hoon aapka host, Shiv Narayanan,
aur aaj hum baat karne wale hain ek truly exciting topic par ,
“Challenging Businesses in the Digital Age.”

Kehte hain na , fun favours the brave.
Aur stock broking ka business is proverb ka ek perfect example hai.

Jahan digital tools aur technology ka role har din badhta ja raha hai,
wahin customer expectations bhi badal rahi hain, aur competition aur bhi zyada fierce hota ja raha hai.

Is exciting aur challenging duniya ko aur achhe se samajhne ke liye,
aaj humare saath hai ek visionary leader aur industry expert ,
Mr. Arun Chaudhary, Director & Chief Business Officer, m.Stock by Mirae Asset.

Arun sir, Bazaar & Beyond mein aapka swagat hai!
Thank you for your time.

Arun: Thank you so much for having me on the show, Shiv. Fantastic , let’s dive right in!

Segment: How the Stock Broking Industry Has Evolved

Shiv: Aaj ke time mein stock broking ka business itna complex kyun ho gaya hai?

Arun: Log samajhte hain ki broker sirf customer ka order leta hai aur exchange pe execute karta hai.
Lekin yeh sirf tip of the iceberg hai.

Customer market mein aata hai ,
chahe directly invest karne ke liye (shares ya F&O),
ya indirectly (mutual funds ya IPO ke through) ,
toh uske peeche ek poora operational chain chalta hai.

Jab koi customer app ya platform se trade karta hai,
main unka order leta hoon,
margin verify karta hoon,
risk manage karta hoon,
fir exchange ko order bhejta hoon,
aur phir shares unke demat account tak pahunchta hoon.

Aur hum log 400+ orders per second execute karte hain ,
toh har order ke saath instant margin check aur compliance bhi hota hai.
Sab kuch real-time mein hota hai , error ki koi gunjaayish nahi hoti.

Shiv: Toh broker ka asli role kya hota hai is poore process mein?

Arun: Main kahunga ki hum ek intermediary hain ,
jo customer ko stock market ke through wealth creation mein help karta hai.
Sirf execution nahi, balki poora process hum handle karte hain taaki experience smooth rahe aur sab kuch regulation-compliant ho.

Shiv: Aapke hisaab se industry kaise evolve hui hai pichhle kuch saalon mein?

Arun: Stock broking ek legacy business raha hai.
BSE 1875 mein incorporate hua, lekin operations modern form mein 1994 ke baad hi shuru hue.
Uske baad NSE aaya, aur tab se electronic trading start hui.

Pehle trades paper aur pencil pe hote the.
Digitalisation ke baad industry mein scale, speed aur transparency aayi.

Shiv: Digitisation ke wajah se customers ko kya major benefits mile?

Arun: Teen major benefits milte hain:

1. Transparency:
   Aapka paisa, order aur settlement , sab kuch live track ho sakta hai.
   Jo pehle sirf broker batata tha, ab aap khud dekh sakte ho.
2. Broker dependency kam hui:
   Aapko pata hota hai ki kya kharida, kis rate pe, kab mila.
   Sab kuch app ya website pe 2 clicks mein mil jaata hai.
3. Operational efficiency:
   Pehle shares demat account mein 10-12 din baad aate the.
   Aaj kal jo shares aap aaj kharidte ho, kal tak ya same day mil jaate hain.

Shiv: Same-day settlement ka kya impact padega?

Arun: Aaj aap jo share kharidte ho, wo aaj hi demat account mein aayega.
Aur agar aap bechte ho, to paisa bhi aaj hi account mein aa jaayega.

India duniya ka pehla exchange banne jaa raha hai jahan same-day settlement shuru hoga.
Aur ye sab digitisation ki wajah se hi possible ho paaya hai.

Shiv: Toh aap overall digitalisation ko kaise dekhte hain?

Arun: Mujhe lagta hai ki digitisation ne processes aur efficiency dono mein massive improvement laaye hain.
Aur iska seedha benefit customer ko mila hai , faster service, better control, aur full transparency.

Segment: How Mobile Apps and Web Platforms Have Transformed the Trading Experience

Shiv: Arun, aap thoda aur light daal sakte hain is par? Specifically, kaise mobile apps aur web trading platforms ne customer experience ko transform kiya hai?

Arun: Bilkul. Sabse pehle baat karte hain convenience ki.
Aaj ek customer ghar baithe-baithe apna demat account sirf 3–4 minutes mein open kar sakta hai ,
jo pehle ek poora din le jaata tha.

Doosri important baat , yeh poora experience ab digitally available hai.
Matlab aap sirf apna Aadhaar aur PAN number use karke mobile se hi account activate kar sakte ho , bina kisi paperwork ke.

Shiv: Woh toh kaafi convenient hai. Transparency ka kya role raha hai is change mein?

Arun: Bohot bada.
Pehle broker pe dependency bohot zyada thi ,
chahe wo trade execution ho, ya aapko batana ho ki kaunsa stock kharidna hai,
ya performance monitor karna ho, ya bechne ka time decide karna ho ,
sab kuch broker ke through hota tha.

Lekin aaj, yeh sab kuch aapke mobile app ke andar hi built-in hai.
Chahe aap mobile use karo ya desktop ,
aap real-time mein sab kuch monitor kar sakte ho.

Shiv: Aur information availability mein kya changes aaye hain?

Arun: Pehle agar kisi ke paas kisi stock ke baare mein ek khaas info hoti thi,
toh woh advantage use karke unfair profits kama sakta tha.
Information flow inefficient tha.

Aaj ke time mein, information sirf ek click pe available hai.
Brokers bohot saare education programs chala rahe hain,
aur online creators bhi investors ko educate kar rahe hain ,
kaise invest karein, kya parameters dekhne chahiye, sab kuch openly discussed hai.
Yeh cheeze kuch saal pehle available hi nahi thi.

Shiv: Toh yeh saari cheezein customer experience ko kaise impact karti hain?

Arun: Mujhe lagta hai aaj ka customer experience ek completely different level pe pahunch gaya hai.
Customer aaj broker se:

• Online connect kar sakta hai
• Chat ya call ke through queries clear kar sakta hai
• Apne investments pe full control maintain kar sakta hai

Bohot saare mediums open ho gaye hain ,
aur yeh ensure karte hain ki har customer confident aur informed investor ban sake.

Shiv: Arun, AI aur Machine Learning jaise buzzwords kaafi time se chal rahe hain. But real impact kya hai broking business mein? Kya actual use cases dekhne ko mil rahe hain?

Arun: Bilkul Shiv, aaj bhi financial services industry mein AI aur ML ka use kaafi limited hai. Ab tak zyada tar automation repeatable manual tasks tak hi limited raha hai – jaise koi kaam jo aadmi baar-baar same tareeke se karta tha, woh automate kar diya gaya. Isse scale aur stability toh aayi hai, lekin real value jo AI aur ML de sakte hain – cost saving, revenue growth ya personalised experience – woh abhi bhi evolve ho raha hai.

Shiv: Aapko kya lagta hai – future mein sabse badi value AI/ML se kaha generate hogi?

Arun: Teen bade areas hain jahan mujhe lagta hai AI/ML kaafi value create kar sakte hain. Pehla hai – customer life understanding. Jaise ek waiter baar-baar dekhke samajh jata hai ki customer ko kya pasand hai, waise hi platforms customer ke digital footprint se unki preferences samajh sakte hain. Agar hum real-time mein ye data use kar saken toh personalised product ya recommendation push ki ja sakti hai.

Shiv: Interesting! Dusra use case?

Arun: Dusra hai customer service. m.Stock mein hum ML algos use karte hain jisse customer ko real-time information milti hai – unke positions, portfolio, ya expected impact of market events. Isse unhe kisi ko call karne ki zarurat nahi padti. Ye proactive service delivery ban jata hai.

Shiv: Teesra?

Arun: Fraud detection. AI se aap real-time mein transaction patterns analyze kar sakte ho aur identify kar sakte ho ki kaha risk zyada hai. Isse security enhance hoti hai.

Shiv: AI based personalised advisory retail investors ke liye bhi kaam karta hai ya sirf HNIs ke liye?

Arun: Traditionally toh yeh HNIs ke liye hi hota tha, but humara goal yeh hai ki har retail investor tak personalised advisory pohch sake. Digital footprints aur transaction patterns ke basis par hum har customer ke risk profile ke according unko suitable stock ya mutual fund advice dena chahte hain – automated aur personalised tareeke se.

Shiv: Broking business mein aaj ke digital aur competitive zamane mein sabse bade challenges kya hain?

Arun: Digital ne boundaries hata di hain. Customer aaj broker ko compare karta hai na sirf doosre brokers se, balki e-commerce, ticketing aur social media apps se bhi. Toh user experience top-notch hona chahiye – 24/7 seamless, stable aur scalable. Dusra challenge hai regulatory changes – compliance aur execution dono. Teesra – technology ki race mein hamesha updated rehna, taaki customer ko best experience mil sake.

Shiv: m.Stock ne customer trust kaise build kiya in tough market conditions?

Arun: Shiv, broking business trust pe chalta hai. Humne tech-first approach liya – jahan automation ne consistency, scale aur accuracy deliver ki. Plus, hum Mirae Asset jaise global trusted brand ka part hain – jo khud 12 countries mein presence rakhta hai. Yeh ek strong foundation banata hai trust ke liye.

Shiv: Future of stock broking aap kaise dekhte hain?

Arun: Penetration abhi bhi bahut kam hai – sirf 1.5% population stock markets mein invest karti hai. Lekin digital infrastructure, government support aur education ke through yeh participation grow karega. SIPs, IPOs aur Bharat tak financial literacy badhne se market mein naye investors aayenge. Agar sab sahi direction mein kaam kare toh penetration 2030 tak double ho sakta hai – ya usse bhi zyada.

Shiv: Kya advice dena chahenge un investors ko jo stock market se wealth create karna chahte hain?

Arun: Patience sabse important hai. Jaldi paisa banane ka mindset galat hai. Diversify karna chahiye – har paisa ek hi jagah mat daalo. Mutual funds, equities, liquid assets – sabka balance hona chahiye. Plus, apni galtiyon se seekhna aur impulsive decisions se bachna zaruri hai. Market har waqt invest karne ki jagah nahi hai – samay samay pe strategy change karni padti hai. Plan banao, study karo, aur long-term focus rakho. Random actions se kuch nahi hota.

Shiv: Mujhe ummeed hai ki aapko stock broking business ke challenges aur strategy ko leke Arun ke insights valuable lage honge.

Zamana sirf challenges nahi, bohot saari opportunities bhi laata hai.
Aur agar vision clear ho aur strategy sahi ho, toh kaafi kuch achieve kiya ja sakta hai , hai na, Arun?

Arun: Thank you so much, Shiv! Bahut maza aaya , thanks for having me.

Shiv: Toh doston, agar aapko yeh podcast pasand aaya ho, toh zaroor subscribe karein,
apne friends aur family ke saath share karein,
aur humein feedback dena na bhoolen.

Agle hafte ek aur engaging topic ke saath milenge.
Tab tak ke liye , informed investing karein
aur apne financial goals ko smartly achieve karein.

Main hoon Shiv Narayanan, milte hain Bazaar & Beyond ke agle episode mein.

Take care & happy investing!